Bas aise hi ek raat ki baat hai, ek raat jo beeti hi nahin hai.
Kal kuch iss tarha barse huye baadalon ki tarha baahon mein gire woh, jaise ek banjar dhuni par boone girti hain.
Aisa toh nahi tha ke woh pehli baar aayi hoon aise.
Par kuch baat thi unki aise bikkhar jaane mein..
Main unhe sameth the -sameth the khud motiyon ki maala bangayi, char-charate huye gir padi meej par.
Aakhir kya baat thi? Kuch waqt hi toh hua tha mile, main sajde mein kyun jhukne lagi thi?
Aisa kyun hota hai ke unke saason ko sunte huye ek ajeeb sa tanaav horaha tha?
Dheemi-dheemi maddham saansein, mano kisi kavi ki kavita ho, iss taal par meri saansein bhi chalne lagi.
Main na so rahi thi, naa hi kuch kehe paarahi thi. Maano waqt ruk gaya ho. Main uss lamhe ko puri tarha se jeena chahti thi.
Ek chote bache ki tarha woh mere pass sogayi.
Bohot abhimani hoon, par aaj baat kuch aur hi hai. Main iss raat ko sameth lu toh?
Jaise aap ne sametha hua hai mujhe?
Aajse pehle aur itne saalo tak kabhi ehsaas nahi kiya, aapke bahoon ke pass ek chota sa bhura til hai.
Shayad bahut kareeb aye ho, tabhi toh dekh paayi woh mulayam baalon ka rang safed ho chala hai.
Agar mere mann mein aap ke naam ki ek kalli ho, toh aaj khil uthi hai woh, kuch kahe bina hi itna kuch hai sunne ko.
Yeh darr kis baat ka hai mujhe? Kuch chhut gaya peeche toh? Yeh taare hass rahe hai mujhpar, meri in baaton pe tim-timaate huye.
Aaj ek sachaai ka ehsaas hua hai. Aapke bina main shayad ek laapata chitthi banjaungi. Jis pe naam toh hai, par phir bhi benaam ho.
Pura aasmaan apne bahoon mein samaya hai aaj…
Kitni roshan hai yeh raat maano haazaro aatishbaaziyan horahi ho mere andar..