Tumare shabdo se bhi zyada gehri ho tum, tumhari har ek baat mere mann pe koi chhaap chhod jaati hai..jaise ke ek nayi naveli dulhan ghar ke aangan mai apne haatho se aalte ki chaap chodti hai ❤
Par itna abhiman kyun hai tumhe?
Kahi Isliye toh nahi, kyun ki baarish ki gungunati boondein tumhare payal pe padte hi shital hojati hai?
Ya phir kahi aisa toh nahi ki tumhare baalon se lipte hui uss gajre ko chu-kar yeh thandi hawa ek silsilahat si mehek deti hai..?
Tumhare haatho mein woh chai ka cup jis pe gulabi se bhi gehri laali lag jaati hai.
Sawaan mein mano jaise tumne uss chai ki pyali ko amar kar diya ho, apne hontho se.
Sandhya dete hue, uss dhune si pavan khud hojati ho…
Apne mangal haatho se, dhune ko hawa dete hue jab tum aangan ki tulsi tak aati ho, tumhare haatho ko dekh kar sochta hoon, kya kabhi tumne mudraye seekhi hai?
Tumhare Lilac rang ki saree pe aasman ke saare taare samate kyun nahi?
Anchal toh phelao…
Tumhare kaano pe saji woh chandi ki baaliyan toh chandrama se bhi zyada chamak rahi hai.
Iss chair pe baithe huye tumhe dekh kar yahi soch raha hoon… ki maano aaj phir chal pada hoon tumhari ore, tumhari taraf..
Mere liye, iss dhalte sooraj ki nayi subha ho tum..
Yeh pura asmaan ho tum.
Tumhi Parvati ho, tumhi Laxmi, tumhi Sarswasti
Tum Devi ho…