Aaj main tumhari tulna apni soch mein, chand se kar raha hoon.
Kabhi soch tha hoon, chand pe bhi insaan pahunch chuka hai.
Jaane walo ne dekha hai, uski khubsurati mein bhi daag hai.
Par tumhe dekhta hoon toh sochta hoon, kaha hai khaamiyan?
Bas ek chota sa til hai, maano ek baade se baag mein akela gulmohar ka podha.
Dekho Annu meri nazro se. Jab tum hasti ho, lagta hai jaise woh til bhi khil uthta hai.
Tumhare ankho ka kajal kabhi chalak bhi jaye toh mano aise lagta hai, ki kaaley baadal ab barasne waley hai.
Yaad hai, Durga ashtami mein humare ghar ke gully se jab tum haste hue nikalti thi, main wahin tha tumhare peeche.
Aisa laga, ek choti se bachi pairo mein alta lagake daud padi apni maa se milne.
Aise jaise, uski Maai kitne dino se apne maaike thehr gayi ho. Uske baad kya hua yaad nahe. Bas uss pal mein tham gaya main.
Chup-chap apne kurte ke pocket mein haath daala, aankhein bandh ki aur ek pyaari si madhur awaz mein jor se kisi ne kaha, “Dugga Dugga Bolo Sobai”.
Sawali si raat thi aur sandhi puja hone hi wali thi, phir tum aayi apne sunehre atrangi adaa mein. Sundar si halki banarasi laal saree mein. Us din toh yeh chand bhi dekho aadha ho gaya tha Annu.
Ek-so-aath baatiyon ke roshni mein itni sundar, tum aur tumhare haatho mein sone ke pacheliyan. Wahi dono haatho ko jodkar tum ne meri taraf dekhte hue kaha,”Aye haath jodo, Maa dekh rahi hai”. Uss ek pal mein mere maan mein hazaar diye roshan hue.
Puja ke yeh paach din aise hi jaate hain tumhare saath Annu. Jab Maa chali jaati hai, tumhare ankho mein jo aansu aate hai, woh mere hai. Tumhare maan mein judai ka jo dukh hai apni Ma se, woh bhi mera hai. Bas gaalon pe laga hua sindoor mera nahi. Ek woh sindoor hi mera nahi, aur nahi hai toh na sahi..
Pyaar maine uss choti si Annu se kiya jo sach mein hi aalta laga kar meri maa ke peeche daudti thi, choti-choti baaton pe ladti thi. Ek din tum ek chidiya banke apna ghosla banane udhjaogi, aisa nahi socha tha.
Agle saal Maa phir ayengi.
Aur tum bhi unke saath aana, apne ghar, mere pass…