Meri ek shikayat hai aaj, ek lambi se list toh nahi bana paayi.
Par iss mausam mein isse zyada na kuch keh paayi aur na kahungi.
Yeh mausum ki hi toh baat hai, ke aaj iss baarish mein mere kajal bhare naina bhi baras pade.
Yeh khaali dopahar mere khaali dil ki tarha hai, maano purane Calcutta ki koi purani office, jaise kuch purane typewriters baj rahe ho aaj bhi – ‘khat- khat’, meri dhadkan ke jaise.
Aaj inn boondo ke saath meri payal ki madhur ‘chhan-chhan’ bhi peeche rehe gayi hai.
Aaj mera yeh saadhaaran jeevan bhi jeene layak nahi.
Sochti hoon aapmein aise ghul mil jaun, jaise kheer mein maa ne kesar milaayi ho.
Aaj iss kalpana ko abaad kardo, maano aapke haath laakh baar geeli mitti par pade ho.
Haar maan kar aapne raat-din uske chehre ke aakar ko pyaar kiya ho.
Piya aaj yeh shikayat hai, mere iss aakar ko apne haatho se phir ekbaar sajaado.
Baarish jise chhoo chuki hai, use ek baar phir aap ke sparsh se apna banalo.
Main – ek nari, aapki dost, aapki kalpana.
Iss kaalpanik sharir ko apni aatma banado.
Ek hi shikayat hai….
Ek hi guzaarish leke aayi hoon.
Bas yahi ek aisi baat hai jise kehte kehte kavita likh padi hoon.